Khasi_Poem

Ka yrta ba jamdien Ka yrta nga la nang jam, ka rynïeng ka la jrong, Ki khohwah ki la ksah ka tyrpeng ruh la khlaiñ Jingtip ruh la ïoh kyrdan ruh la don Balei pat kumne nga dang sah khynnah' Katba dang iaid ki ïa ka dur khmat ka ilung, ka lynghoh jabieng ruh ka nang thylli Kat sha ba nga phai ki kheiñ u khunlung, ym don ba burom ym don ba ñiewkor. Liak nga phai dien, ka thie ka jingim khynnah La ka dang rit pynban ka don ka maiñ rangbah Namar ki rishot la deiti ki pyndep Ki kloi ban kit ram namar ia nga ban rah sha kyrdan bad ka nam. Ki dei ki lam khmat , ki dang shylluit ha khmat ka pyrthei te sa lei Kim salia ban tur ia ka ding, bad pha la jingmyntoi shimet Mynta nga iohi ba bunsien ki jynthut ki ur bad ki kyllon Pynban ia mon ba jwat jong ki ym don ba lah ban khñion La ki dang lung Ki dei ki nongsdang kumta ki sei borbah Mynta ynda lyngkor longkñi ha phi pat ka hap Phi kham lung shuh shuh shihajar shah ban ia ki Wat la Khlaw la prat bad lynti la soi lypa Pynban phi sah ha um dum phim nang ban iaid bad phim tip shano ban jam. Ka jingsarong ka shong kulai bad U Alhia u ban na khlieh phi la nang ka thew ka woh phi jaipdeh pat ka saiñ Ia kam ki longshwa phi ïaroh tangba phim mon ban ai nam Mynta nga sah khynnah te balei phim kyndit thiah Ioh ba por kan poi ba ia (Nga)ki kambah ki longshwa yn buh sah kynmaw sa shisien ha lum bad ha wah. Kiwei ki nang kiew shaphrang bad sha neng La bun u mawmer ba ki la iaid lyngba bad ieh shadien Nga pat seh hajuh shi hajuh nga iaid bad ka ktaid Balei phim shlan ban bud lynti u ñi u ma Bad shlur ban kam ia hok longtrai Ka por kan sa dier, ieng rangbah noh Sangeh ka tynneng bad tynjuh ia dor jong nga Ko Rishot to pynkhlaiñ bad pynskhem ban kyrshan Shim ka wait u mohkhiew ban prat ban puh ban daiñ Ka lyngkha bah ha phi nga ai nongkynti Pynksan la ka rngiew bad sei la borbah Sa shisien nga da sliang ban ieng pynat shadem Ha khmat u paid byllien